Seriean Alemaniako fabrikazioko lehen kamioi elektrikoa da, Estatuan eta Europan abian jarria, eta Kontsortzioaren, MAN enpresaren eta Garrai enpresa operadorearen arteko lankidetzaren emaitza da. Lankidetza horrek Gipuzkoako Hondakinen Kontsortzioaren konpromisoa indartzen du, mugikortasun garbiago eta jasangarriagoarekin.

José Ignacio Asensio: “Garraioa deskarbonizatzea funtsezkoa da, mugikortasuna baita hondakinen kudeaketan emisioen fokurik handiena. Horregatik, honelako ekimen bat jarri dugu abian, neutraltasun klimatikorako bidea markatuz”.

Gipuzkoako Hondakinen Kontsortzioak (GHK), José Ignacio Asensio Jasangarritasun diputatua buru duela, urrats aitzindaria eman du modernizazio- eta deskarbonizazio-estrategian, MAN enpresak fabrikatutako serieko lehen kamioi elektrikoa sartu baitu. Ibilgailu % 100 elektriko horrek GHKri bakarrik emango dio zerbitzua, Sasietako Transferentzia Estaziotik Zubietako Ingurumen Guneraino hondakinak garraiatzeko ibilbidean, Sasietako eta Tolosaldeko mankomunitateen zerbitzura. Txertatze hori aurrerapen garrantzitsua da Kontsortzioaren ingurumena hobetzeko estrategiaren barruan, eta trantsizio ekologiko bidezko eta teknologikoaren aldeko apustua indartzen du.

Gaur goizean aurkeztu dute ibilgailua Sasietako Transferentzia Estazioan. Bertan izan dira Gipuzkoako Hondakinen Kontsortzioko presidente José Ignacio Asensio, MAN Truck & Bus Iberiako zuzendari nagusia, Stéphane de Creisquer, Sasieta Mankomunitateko presidente Leire Artola eta Transportes Garrai enpresako gerente Jesús Dorronsoro. Azken horrek bultzatu du hobekuntza hori mugikortasun garbiagoarekiko konpromisoaren zati gisa. Jardunaldiaren barruan erakundeen esku-hartzeak, zinta-mozketa sinbolikoa eta kamioi elektrikoaren lehen deskarga Sasietako Transferentzia Estazioan egin dira, eta horrek Gipuzkoako hondakinen garraioan etapa berri baten hasiera markatu du.

Ekimen honek neutraltasun klimatikorako bidea markatzen du, eta lurraldeko hondakinen garraio sistema osoaren elektrifikazio prozesuaren parte da, Gipuzkoako Foru Aldundiko Jasangarritasun Departamentuaren Deskarbonizazio Estrategiaren zutabeetako bat.

Eredu aitzindaria mugikortasun jasangarrian

Alemanian fabrikatzen da oso-osorik, Volkswagen taldeak garatutako goi-tentsioko bateriak barne. MAN kamioi berria industria-garraioaren arloko iraultza teknologiko bat da. Guztiz probatuta eta diseinatuta dago barne-errekuntzako ibilgailuen malgutasun operatibo bera eskaintzeko, baina zero emisiorekin.

Gainera, MANek tailer aitzindari bat jarri du abian Bartzelonan, bateria elektrikoak gelaxka-mailan konpontzea ahalbidetzen duena, eta horrek bigarren eta hirugarren bizitza erabilgarria bermatzen du eta ekonomia benetan zirkularraren aldeko apustua indartzen du.

Ibilgailu horrek aplikazio bakoitzerako neurrira egindako irtenbideak ditu, eta MANen babes teknikoa du, zeinak birkargatzeko eta egokitzapen operatiborako azpiegiturari buruzko aholkularitza espezializatua eskaintzen baitu.

José Ignacio Asensio: “Beste urrats bat Gipuzkoako Hondakinen Kontsortzioaren deskarbonizazio-estrategian”

Bere hitzaldian, Hondakinen Kontsortzioko presidente eta Jasangarritasuneko diputatu José Ignacio Asensiok nabarmendu duenez, “hondakinen garraioaren elektrifikazioa funtsezko urratsa da Gipuzkoako hondakinen kudeaketa-sistemaren karbono-aztarna murrizteko. Mugikortasun garbiaren eta irtenbide teknologiko eta bideragarridun trantsizio ekologikoaren aldeko apustua egiten dugu”.

Asensiok azpimarratu duenez, “garraioa deskarbonizatzea funtsezkoa da, mugikortasuna baita hondakinen kudeaketan emisioen fokurik handiena. Horregatik, hondakinak garraiatzeko sistema elektrifikatu nahi dugu, gure Deskarbonizazio Estrategiaren barruan neutraltasun klimatikorako bidea markatzen”.

Bestalde, MAN Truck & Bus Iberiako zuzendari nagusi Stéphane de Creisquerrek adierazi duenez, “egun hau mugarri bat da MANek Espainian izan duen historian. Garraio jasangarriarekin dugun konpromisoa berresten dugu Garrairen eta GHKren eskutik. Ibilbide hori deskarbonizatzea lehen urratsa da hurrengo belaunaldientzat etorkizun hobe baterantz eboluzionatzeko. Proiektu hau eragile guztien konpromisoari esker gauzatu da”.

Asensiok azpimarratu duenez, sartze hori “lankidetza publiko-pribatuaren eta Garrai eta MAN bezalako enpresek ekonomia jasangarriago, lehiakorrago eta berritzaileagoarekin duten konpromisoaren emaitza da”. “Frogatzen ari gara erakunde publikoak abangoardia teknologikoan egon gaitezkeela, aldaketaren buru izan gaitezkeela eta gure ikuspegi bera partekatzen duten enpresekin lankidetzan aritu gaitezkeela”.