Europan aseguratutako balorizazio energetikoko instalazioetatik bostek bakarrik lortu dute bikaintasun-maila hori segurtasunean eta babesean.

José Ignacio Asensio: “Ziurtagiri horrek Gipuzkoako Ingurumen Gunea Europako instalazio seguruenen artean kokatzen du. Nazioarteko bermea da, herritarrei ahalik eta babes eta konfiantza handiena bermatzen diena. Gipuzkoako Ingurumen Guneak berriz ere frogatzen du jasangarritasunaren eta hondakinen kudeaketaren abangoardian dagoela”.

Gipuzkoako Ingurumen Guneak (GIG-1) nazioarteko mugarri bat lortu du; izan ere, Europa osoko bosgarren planta bihurtu da Babes Handiko Arriskuaren (HPR) ziurtagiria lortzen, FM aseguru-etxeak emana, zeina nazioarteko aseguru-etxe liderra baita galeren prebentzioan eta jabetza-aseguruetan korporazio handietarako. Ziurtagiri hori oso zorrotza eta lortzeko zaila da, eta agerian uzten du kudeaketaren bikaintasuna, eta aitortzen du GIG-1eko instalazioek (balorizazio energetikoko instalazioa barne) betetzen dituztela segurtasuneko, fidagarritasuneko eta arriskuen prebentzioko munduko estandar altuenak.

Ziurtagiria Ekondakini eman zaio, GIG-1en diharduen enpresari, eta Gipuzkoako Hondakinen Kontsortzioko (GHK) presidente José Ignacio Asensiok eta Urbaserreko Hondakinen Tratamenduko zuzendari eta Ekondakineko kontseilari Rafael Guineak jaso dute. Entrega Christopher Dempseyk, FMko Europa, Ekialde Ertain eta Afrikako CEOak egin du.

Aparteko aitorpena

Zubietako Ingurumen Gunea elite-talde txiki horretan sartzeak Gipuzkoa Europako abangoardian jartzen du industria-segurtasunari eta hondakinen kudeaketa aurreratuari dagokienez.

Eraikuntzan eta diseinuan maila altuenak lortzen dituzten, suteen aurka babesteko ekipamendu bereziak dituzten eta galerak prebenitzeko neurri zorrotzak aplikatzen dituzten instalazioei soilik ematen zaie ziurtagiria. Horren helburua da gertakari larrietarako probabilitatea minimizatzea, sute edo hondamendi naturaletatik hasi eta akats mekanikoetara arte, jardueraren jarraitutasuna eta komunitateen segurtasuna bermatuz ingurunean.

Herritarrentzako bermea

Gipuzkoako Hondakinen Kontsortzioko (GHK) presidente José Ignacio Asensio pozik agertu da nazioarteko aitorpen horrekin: “HPR ziurtagiria lehen mailako abala da, eta Gipuzkoako Ingurumen Gunea Europan erreferentziazko instalazioa dela berresten du. Herritarrak ziur egon daitezke hondakinak babes handiko ingurune batean tratatzen direla, sistema aurreratuenez hornituta”.

GHK-ko presidenteak gaineratu duenez, “ziurtagiri hori lortzeko Europako bosgarren planta bihurtzeak erakusten du Gipuzkoa lurralde aurreratuenetako bat dela jasangarritasunaren, segurtasunaren eta hondakinen kudeaketaren arloan. Harrotasuna da gure lurraldearentzat eta etorkizuneko bermea”.

FMri buruz

FM Estatu Batuetako elkarrekiko aseguru-konpainia bat da, 1835ean sortua, eta Rhode Islanden kokatzen da. Nazioarteko erreferentea da jabetza-arriskuen kudeaketan eta galeren prebentzioan, eta Fortune 500 zerrendako lau enpresatik bati ematen dio zerbitzua. Bere negozio-eredua ikuspegi berritzaile batean oinarritzen da: arriskuak irizpide estatistikoekin soilik kalkulatu beharrean, ingeniaritza-analisiak erabiltzen ditu balizko esposizioak identifikatzeko, lehenesteko eta arintzeko, betiere epe luzerako ikuspegiarekin.

Finantza-kredentzialen artean, nabarmentzekoak dira "A+" indar-kalifikazioa (goi-mailakoa): AM Best, AA (oso solidoa), Fitch Ratings eta A+ (solidoa) S & P. Nazioarteko bulego-sareak aukera ematen dio mundu osoan zerbitzua emateko eta segurtasun-maila aurreratuenak behar dituzten sektore estrategikoetako enpresekin lan egiteko.