José Ignacio Asensio: “Berritze honek Gipuzkoak hondakinen gaikako bilketan eta tratamenduan duen egoera indartzen du, zabortegien beharra ezabatuz eta gipuzkoarrek ingurumena babestearekin duten konpromisoa islatzen duen eredu jasangarria sustatuz”.

Gipuzkoako Hondakinen Kontsortzioak (GHK) ontziak sailkatzeko eta bereizteko Urnietako instalazioaren birmoldaketa inauguratu du gaur. Mugarri horrek markatzen du bere kudeaketaren pean dauden hondakinak tratatzeko instalazio guztiak prest jartzea. Ekitaldia lantegiaren instalazioetan egin da, eta honako hauek parte hartu dute: José Ignacio Asensio, GHK-ko presidentea eta Jasangarritasuneko diputatua; César Gimeno, GHK-ko zuzendari nagusia; Joachim Domroes, Trienekens-eko CEOa; eta Pedro Goicoechea, Trienekens-eko zuzendari nagusia.

Ekitaldian, nabarmendu da Trienekens-ek, instalazioaren operadore arduradunak, berrikuntza bat egiteko egindako ahalegina. Horretarako, 800.000 euroko inbertsioa egin du GHK-k, eta Gipuzkoa erreferente bihurtu da gaikako bilketan eta hiri-hondakinen tratamenduan, nazio-mailan.

GHK-ko presidente José Ignacio Asensiok azpimarratu duenez, berritze horrek Gipuzkoa “hondakinen gaikako bilketan eta tratamenduan abangoardian" kokatzen du, zabortegien beharra ezabatuz eta gipuzkoarrek ingurumena babestearekin duten konpromisoa indartzen duen eredu jasangarria sustatuz. “Inbertsio horri esker, tratamenduaren produktibitatea, segurtasuna eta kalitatea hobetzen ditugu, ontzien birziklatzea hobetuz eta ekonomia zirkularraren ereduarekiko gure konpromisoa indartuz”, adierazi du Asensiok.

Gipuzkoako hondakinak kudeatzeko funtsezko planta

Urtean 15.000 tona ontzi tratatuz, Urnietako plantak Legazpiko planta berrituarekin bat egiten du; 2018an eguneratu zena, 3 milioi euroko inbertsioarekin. Oro har, bi instalazioek urtean 26.000 tona ontzi kudeatzeko aukera ematen dute, material motaren arabera bereizitako birziklatzaileetara bidaliz eta prozesuan ahalik eta eraginkortasun handiena ziurtatuz.Herritarren eta erakundeen baterako ahaleginari esker, Gipuzkoa kopuru errekorrera iritsi da ontzien gaikako bilketan edukiontzi horiaren bidez: 33 kg biztanle bakoitzeko urtean, estatuko batez bestekoaren ia bikoitza. Lidergo-posizio horrek islatzen du lurraldeak jasangarritasunarekiko eta ekonomia zirkularrarekiko duen konpromisoa.

Aipatzekoa da 2022an lurraldeko birziklatze-tasa % 54ra iritsi zela, eta horrek esan nahi du 12 puntutik gorako igoera esanguratsua izan dela 2015. urtearekin alderatuta. Datu horren arabera, Gipuzkoa oso gertu dago 2025erako Europako % 55eko helburua betetzeko, lurraldea hondakinen kudeaketan erreferente gisa finkatuz Espainian eta Europan. Era berean, gaikako bilketak, % 60ko indizearekin 2022an, lurraldean ezarritako sistemen arrakasta, herritarren kontzientzia eta GHK-k abian jarritako azpiegiturak berresten ditu.

Berritutako instalazioak bisitatzea

Inaugurazio-diskurtsoen ondoren, bertaratuek bisitaldi gidatua egin dute instalazioetan, eta berritzearen xehetasun teknikoak aurkeztu dituzte. Egindako hobekuntzen artean, honako hauek nabarmentzen dira: ontziak hartzeko eremua hobetzea, prozesuko bi nabeak konektatzea produktibitatea handituz, instalazio osoa ixtea eta segurtasun-baldintzak indartzea, birziklatzearen kalitatea eta eraginkortasuna handitzeko.

Urnietako lantegia, beraz, hondakinak kudeatzeko Gipuzkoako ereduaren adibide da, etorkizun jasangarriago baterako bidea markatzen jarraitzen baitu.